Mumbai ke Goregaon sthit NESCO Ground mein April mein hue techno music concert se judi dardnaak ghatna mein bada khulasa hua hai. Forensic Science Laboratory (FSL) ki toxicology reports ne do MBA students ke samples mein MDMA yani “Ecstasy” drug ki maujoodgi ki pushti kar di hai.
Mritak students ki pehchan 24 saal ki Shreya Rai aur 25 saal ki Sheetal Salvi ke roop mein hui hai. Dono South Mumbai ke ek management institute ki second-year MBA students thi aur 11 April ko NESCO mein ayojit techno concert mein apne doston ke saath shamil hui thi. Concert ke dauran tabiyat bigadne par unhe hospital le jaya gaya, lekin ilaaj ke dauran dono ki maut ho gayi.
Jaanch mein saamne aaya hai ki MDMA (Ecstasy) pills ka istemal kiya gaya tha. FSL report milne ke baad doctors ab final medical opinion aur maut ke exact cause ka nirdharan karenge. Police ne is mamle ko gambhirta se lete hue culpable homicide aur NDPS Act ke tahat case darj kiya hai.
Investigation ke dauran Mumbai Police ne ek bade drug syndicate ka bhi khulasa kiya hai. Police ke mutabik, Ecstasy pills videsh se smuggle karke Mumbai pahunchayi gayi thi aur concert tak supply ki gayi. Is mamle mein kai aaropiyon ko giraftar kiya ja chuka hai, jinmein alleged drug suppliers, event se jude log aur anya sandigdh shamil hain.
Police ka kehna hai ki yeh Mumbai ke haal ke sabse charchit drug cases mein se ek hai. Toxicology report ne ab tak ki jaanch ko majboot aadhar diya hai aur aane wale dino mein aur bhi giraftariyan ho sakti hain.
Mumbai Sansani Impact
Is ghatna ne ek baar phir bade music concerts aur youth parties mein drugs ke badhte istemal par sawaal khade kar diye hain. Parents aur authorities dono hi event security aur narcotics control ko lekar zyada sakhti ki maang kar rahe hain.