Mumbai: Chembur mein hue dardnaak haadse ne poore shahar ko jhanjhor kar rakh diya. School bus ke paas ped girne ki ghatna mein 11 saal ke ek bachche ki maut ho gayi. Is haadse ke baad saamne aaya ek emotional video har kisi ki aankhen nam kar raha hai.
Viral video mein bachche ki maa apne bete ka cricket bat seene se lagaye hue nazar aa rahi hain. Maa ka dard aur bebasi dekhkar log gahra shok vyakt kar rahe hain. Yeh manzar social media par tezi se viral ho raha hai.
Jaankari ke mutabik, haadsa us waqt hua jab school bus ke paas achanak ek bada ped gir gaya. Bachcha is ghatna mein gambhir roop se ghayal ho gaya tha. Use turant aspataal le jaya gaya, lekin doctors use bacha nahi sake.
Police aur civic authorities ne maamle ki jaanch shuru kar di hai. Saath hi yeh bhi pata lagaya ja raha hai ki ped girne ke peeche kya wajah thi aur kya is maamle mein kisi tarah ki laparwahi hui thi.
Is dardnaak ghatna ke baad sthaniya logon ne baarish ke dauran purane aur khatarnak pedon ki samay par jaanch aur pruning ki maang ki hai, taaki aise haadson ko bhavishya mein roka ja sake.