Mira Road Crane Collapse: Mira Road crane collapse case mein ek naya mod saamne aaya hai. Haadse mein jaan gawaane wale victim ke pita ne Bombay High Court ka darwaza khatkhataya hai. Unhone maang ki hai ki is maamle ki FIR mein builder JP Infra ka naam bhi shamil kiya jaye.
Petition mein aarop lagaya gaya hai ki crane collapse sirf ek durghatna nahi thi, balki project se judi kathit laparwahi ka nateeja tha. Victim ke parivaar ka kehna hai ki jab tak builder aur zimmedar logon ke khilaaf kanooni karvaai nahi hoti, tab tak nyay poora nahi hoga.
Yachika mein High Court se appeal ki gayi hai ki police ko nirdesh diya jaye ki FIR mein JP Infra ko bhi aaropi ke roop mein naamzad kiya jaye aur haadse ki nishpaksh aur gehri jaanch karai jaye.
Filhaal Bombay High Court ne maamle par sunwai shuru kar di hai. Police aur anya sambandhit agencies is poore case ki jaanch kar rahi hain, jabki victim ke parivaar ko ummeed hai ki court ke hastakshep se zimmedaron par sakht karvaai hogi.