Mumbai se Dia Mirza ke Diwali campaign video ko lekar ek bada legal update saamne aaya hai. Bombay High Court ne Brihanmumbai Municipal Corporation (BMC) ke us kadam par naaraazgi jataayi, jismein actress Dia Mirza ka firecracker-free Diwali awareness video social media se hata diya gaya tha. Court ne kaha ki India ek secular country hai aur environment se jude mudde ko religion ya caste ke nazariye se nahi dekhna chahiye. Is poore vivaad ki shuruaat tab hui jab BMC ne Diwali ke dauraan air pollution aur noise pollution ko kam karne ke liye awareness campaign chalaya. Is campaign mein Dia Mirza samet kai celebrities ne logon se firecrackers ke istemaal ko lekar saavdhaani baratne ki appeal ki thi.Lekin Dia Mirza ke video par Mumbai BJP chief Ameet Satam ne aitraaz jataya. Iske baad BMC ke social media accounts se actress ka video hata diya gaya, jabki campaign mein shaamil kuch doosre celebrities ke videos online bane rahe. Is faisle ke baad political controversy aur bhi badh gayi.
Court ki sunwaai ke dauraan Justice Girish Kulkarni aur Justice Neela Gokhale ki bench ne politicians ke comments par displeasure jataya. Court ne kaha ki environment aur public health se jude awareness campaign ko doosra rang dena sahi nahi hai, kyunki pollution ka asar har insaan par padta hai, chahe uska religion ya caste kuch bhi ho. Court ne BMC se deleted video ko dobara upload karne ko kaha. Bench ne yeh bhi kaha ki Mumbai jaise shehar ki pehchaan aapas mein mil-julkar rehne aur ek-doosre ka sammaan karne mein hai. Public awareness ke liye kiye gaye kaam ko political ya religious controversy mein badalna society ke liye theek nahi hai. Dia Mirza ne bhi apne video ka bachaav karte hue kaha tha ki unka maksad logon ko pollution ke nuksaan ke baare mein jagrook karna aur Diwali ko zyada mindful tareeke se celebrate karne ka sandesh dena tha.
Ab is poore maamle mein sabse bada sawaal yeh hai ki public awareness campaign ko lekar shuru hua vivaad aakhir itna bada political aur legal issue kaise ban gaya? Bombay High Court ki tippani ne ek baar phir environment, public health aur secular values ki ahmiyat ko saamne rakha hai.
Dia Mirza ke firecracker-free Diwali awareness video par hue vivaad mein Bombay High Court ne BMC ke kadam par naaraazgi jataayi. Court ne kaha, “India is a secular country,” aur video ko dobara upload karne ko kaha. Aakhir ek pollution awareness video par itna bada vivaad kyun hua?