Mumbai ke South Mumbai se ek badi khabar saamne aa rahi hai, jahan Maharashtra ke Forest Minister Ganesh Naik ke official bungalow ‘Pawanagad’ mein achanak aag lag gayi. Yeh bungalow Mantralaya ke bilkul saamne Churchgate area mein Amdar Niwas ke andar sthit hai.
Jaankari ke mutabik, Budhwar, 11 November ko dopahar kareeb 11:43 baje bungalow mein aag lagne ki ghatna saamne aayi. Shuruaati jaankari ke anusaar, bungalow ke AC unit mein aag lagne ka shak jataya ja raha hai.
Aag lagte hi mauke par afra-tafri ka mahaul ban gaya. Bungalow se nikalte dhuein ke gubbaar ka video bhi saamne aaya hai. Incident ki information milte hi Mumbai Fire Brigade ki team turant mauke par pahunchi aur aag par kaabu paane ke liye firefighting operation shuru kiya.
Fire officials ne is incident ko Level-1 Fire Call declare kiya. Sabse rahat ki baat yeh hai ki ab tak is ghatna mein kisi ke ghaayal hone ya jaan jaane ki khabar saamne nahi aayi hai.
Filhaal aag lagne ki exact wajah aur hue nuksaan ko lekar jaanch jaari hai. Ab sawaal yeh hai ki Mantralaya ke saamne sthit ek mantri ke official bungalow mein aakhir aag kaise lagi?
Mumbai Sansani – Har Khabar Sabse Pehle, Har Sach Sabse Tez!