Mumbai ki lifeline kahi jaane wali local train se ek hairaan kar dene wala maamla saamne aaya hai. Churchgate-Dahanu local train ke ladies compartment mein do mahilaon ne ek passenger par chappal se hamla kar diya. Is poore incident ka video social media par viral hone ke baad Mumbai local mein passenger safety ko lekar ek baar phir sawaal uthne lage hain.
Jaankari ke mutabik, yeh ghatna Monday morning Churchgate-Dahanu local train ke ladies compartment mein hui. Viral video mein dekha ja sakta hai ki do mahilaen ek doosri mahila passenger ko chappal se maarti nazar aa rahi hain. Compartment mein maujood doosri mahila passengers bhi is poore incident ko dekhti hui nazar aa rahi hain.
Video saamne aane ke baad social media par logon ne is ghatna ki kadi ninda ki hai. Kai users ne railway authorities se maamle mein action lene ki maang bhi ki hai.
Haalanki, abhi tak is baat ka khulasa nahi hua hai ki aakhir in mahilaon ke beech vivaad kis baat ko lekar shuru hua tha. Is jhagde ke peeche ki asli wajah aur poori circumstances abhi clear nahi hain.
Mumbai local mein lagataar saamne aa rahe aise incidents ne commuters ki safety ko lekar chinta badha di hai.
Ab sawaal yeh hai ki aakhir local train ke ladies compartment mein aisa kya hua, jiski wajah se mamooli vivaad maarpeet tak pahunch gaya? Kya railway authorities is viral video ka sangyan lekar koi action lengi?
Mumbai Sansani – Har Khabar Sabse Pehle, Har Sach Sabse Tez!