Mumbai Trans Harbour Link (Atal Setu) par ek hairaan kar dene wala video social media par tezi se viral ho raha hai. Video mein do yuvak two-wheeler ban ke bawajood bike lekar Atal Setu par ghuste aur wrong side par high-speed ride karte nazar aa rahe hain.
Viral video mein dono bikers traffic rules ki khuleaam dhajjiyan udaate dikh rahe hain. High-speed mein wrong side se bike chalane ki wajah se kisi bhi waqt bada haadsa ho sakta tha. Is ghatna ne Atal Setu ki suraksha aur enforcement ko lekar bhi sawaal khade kar diye hain.
Jaankari ke mutabik, Atal Setu par motorcycles aur scooters ki entry pehle se hi pratibandhit hai, lekin iske bawajood bikers ne niyamon ko nazarandaz karte hue bridge par entry ki aur khatarnak stunt kiya.
Video viral hone ke baad police ne maamle ka sangyan liya hai aur CCTV footage ke aadhar par bikers ki pehchan kar unke khilaaf kanooni karwai ki taiyari shuru kar di hai. Adhikariyon ne logon se appeal ki hai ki traffic rules ka palan karein aur apni jaan ke saath-saath dusron ki suraksha ko bhi khatre mein na daalein