Mumbai: Mumbai aur Gujarat mein lagataar ho rahi tez baarish ka asar ab railway services par bhi dekhne ko mil raha hai. Western Railway ne Vapi-Udvada section mein bank slip (track ke paas mitti khisakne) ki ghatna ke baad kai long-distance trains ko cancel kar diya hai, jabki kai trains ko short-terminate aur short-originate kiya gaya hai.
Railway officials ke mutabik, lagataar baarish ki wajah se Vapi-Udvada route par track ke paas zameen khisak gayi, jisse safety ko dekhte hue train operations mein badlav karna pada. Kisi bhi tarah ke haadse se bachne ke liye affected section par rail traffic ko temporary taur par control kiya gaya hai.
Is faisle ke baad Mumbai se Gujarat aur North India jaane wale hazaron passengers ko pareshani ka saamna karna pad raha hai. Kai yatri stations par updates ka intezar karte nazar aaye, jabki kuch ko apni travel plans bhi badalne pade.
Western Railway ki engineering aur maintenance teams mauke par pahunch kar track ki marammat aur safety inspection mein juti hui hain. Authorities ka kehna hai ki route ko poori tarah surakshit banane ke baad hi normal train services dobara shuru ki jayengi.
Railway ne passengers se appeal ki hai ki safar par nikalne se pehle apni train ka latest status zaroor check karein aur official updates par nazar banaye rakhein. Monsoon ke dauran safety ko sabse badi priority bataya gaya hai.