Latur ST Bus Accident: Maharashtra ke Latur mein ek hairan kar dene wala haadsa saamne aaya hai. Ek passenger par aarop hai ki usne chalti hui Maharashtra State Transport (ST) bus ka steering wheel achanak kheench diya, jiski wajah se driver ka bus par control chhoot gaya.
Bus bekaabu hokar paas khadi school buses se ja takraayi. Is haadse mein kam se kam 5 log ghayal ho gaye. Ghayalon ko turant najdeeki hospital mein bharti karaya gaya, jahan unka ilaaj jaari hai.
Prarambhik jaankari ke mutabik, steering kheenchne ki wajah se bus seedhe school buses se takra gayi. Ghatna ke baad ilaake mein afra-tafri mach gayi aur sthaniya log bhi madad ke liye pahunch gaye.
Police ne aaropi passenger ko hirasat mein lekar maamle ki jaanch shuru kar di hai. Filhaal yeh pata lagaya ja raha hai ki usne steering wheel kis wajah se kheenchha aur ghatna ke peeche asal karan kya tha. Authorities poore maamle ki jaanch kar rahi hain.