Mumbai: ki lifeline kahi jaane wali local train se ek hairaan kar dene wala video saamne aaya hai, jismein ek shakhs chalti train ke andar ek mahila ko belt se dhamkate aur hamla karte hue nazar aa raha hai. Sabse zyada chaukane wali baat yeh rahi ki coach mein maujood kai co-passengers is poori ghatna ko dekhte rahe, lekin kisi ne bhi turant beech-bachav karne ki himmat nahi dikhayi.
Viral video mein aaropi belt haath mein lekar mahila ko daraata-dhamkata dikh raha hai. Mahila khud ko bachane ki koshish karti nazar aati hai, jabki aas-paas maujood yatri chup-chaap tamasha dekhte rahe. Is ghatna ka video social media par tezi se viral ho gaya hai, jiske baad logon ne co-passengers ki khamoshi par bhi sawaal uthaye hain.
Video viral hone ke baad Mumbai Police aur Railway Police se aaropi ke khilaaf sakht karvai ki maang ki ja rahi hai. Kai social media users ne kaha ki agar kisi ek yatri ne bhi himmat dikhayi hoti, to shayad mahila ko itni pareshani ka saamna na karna padta.
Filhaal yeh spasht nahi hai ki yeh ghatna kis route ki local train mein hui aur aaropi ko giraftar kiya gaya hai ya nahi. Adhikaarik agencies viral video ke aadhar par maamle ki jaanch kar rahi hain. Police ki taraf se adhikarik jaankari aane ka intezar hai.
Yeh ghatna ek baar phir Mumbai Local mein mahila suraksha aur emergency situation mein public intervention ko lekar bade sawaal khade karti hai.