Mumbai: Mumbai Crime Branch ne ek badi karvayi karte hue doosre rajya se Mumbai laayi gayi foreign-made illegal pistols aur 50 zinda cartridges ka bada jakhira baramad kiya hai. Is operation ke dauran police ne do aaropiyon ko giraftar kar liya hai.
Police ke mutabik, aaropi doosre state se illegal hathiyaar Mumbai laakar unki supply karne ki taiyari mein the. Crime Branch ko mili gupt soochna ke aadhaar par trap bichhaya gaya, jahan se foreign-made pistols aur 50 live cartridges ke saath dono ko range haath pakad liya gaya.
Prarambhik jaanch mein saamne aaya hai ki jabt kiye gaye hathiyaar kisi badi criminal activity mein istemal hone wale the. Police ab is baat ki jaanch kar rahi hai ki ye illegal weapons kis network ke zariye Mumbai tak pahunchaye gaye aur inka final receiver kaun tha.
Filhaal Crime Branch ne Arms Act aur anya sambandhit dharaon ke tehat case darj kar liya hai. Dono aaropiyon se poochtaach jaari hai aur police is illegal arms racket se jude anya logon ki talaash mein lagataar chhaapemari kar rahi hai. Is karvayi ko Mumbai mein illegal arms supply network ke khilaaf ek badi safalta maana ja raha hai.