Maharashtra ke Raigad mein lagataar ho rahi tez baarish ke beech ek hairaan kar dene wala haadsa saamne aaya hai. HPCL ke Patalganga LPG Bottling Plant ki boundary wall floodwater ke pressure se toot gayi, jiske baad lagbhag 3,000 LPG cylinders tez bahaav ke saath Patalganga River mein bah gaye. Social media par viral videos mein laal gas cylinders ko nadi mein tairte hue dekha ja sakta hai.
Zila prashasan ne logon se sakht appeal ki hai ki agar kisi ko nadi ya aas-paas ke ilaake mein LPG cylinder mile to use haath na lagayein aur ghar na le jaayein. Kuch cylinders mein ab bhi gas ho sakti hai, jiski wajah se woh khatarnak sabit ho sakte hain. Authorities recovery operation chala rahi hain aur logon se turant suchna dene ki appeal ki gayi hai.