Mumbra Balcony Collapse: Thane ke Mumbra se ek dardnaak haadsa saamne aaya hai. Yahan ek 37 saal purani building ki second-floor balcony achanak gir gayi, jiski chapet mein aane se 13 saal ki ek ladki ki maut ho gayi. Is haadse mein kai anya log bhi zakhmi hue hain.
Eyewitnesses ke mutabik, balcony achanak bharbharakar neeche gir gayi, jisse ilaake mein afra-tafri mach gayi. Sthaniya logon aur rescue team ne turant malbe mein fase logon ko bahar nikala aur ghayalon ko najdeeki hospital pahunchaya.
Police aur civic authorities ne ghatna sthal ka muayena shuru kar diya hai. Prarambhik jaanch mein building ki purani aur kamzor structure ko haadse ki wajah maana ja raha hai. Officials ab is baat ki bhi jaanch kar rahe hain ki building ka structural audit hua tha ya nahi aur kisi tarah ki laparwahi hui thi ya nahi.
Is dardnaak haadse ke baad Mumbra ke purani buildings ki safety ko lekar ek baar phir gambhir sawaal khade ho gaye hain.