Thane/Kausa: Kausa ke Qadar Palace Gali mein ek dardnaak haadse ne poore ilaake ko hila kar rakh diya. Bijli ka karant lagne se 17 saal ki ek ladki ki maut ho gayi. Ghatna ke baad parivaar aur sthaniya logon mein shok ka mahaul hai.
Prarambhik jaankari ke mutabik, ladki kisi kaam se gali se guzar rahi thi, tabhi achanak uska sampark bijli ke current se ho gaya. Karant itna tez tha ki woh gambhir roop se jhulas gayi. Sthaniya logon ne turant use najdeeki aspataal pahunchaya, lekin doctors ne jaanch ke baad use mrit ghoshit kar diya.
Ghatna ki soochna milte hi police aur sambandhit vibhag ke adhikari mauke par pahunche aur poore maamle ki jaanch shuru kar di. Police yeh pata lagane ki koshish kar rahi hai ki karant kis wajah se phaila aur kya is maamle mein kisi ki laparwahi zimmedar thi.
Is dardnaak ghatna ke baad sthaniya logon ne ilaake mein khule bijli ke taar aur suraksha vyavastha ko lekar gambhir sawaal uthaye hain. Police ne accidental death ka case darj kar aage ki jaanch shuru kar di hai.