Mumbai-Ahmedabad Highway par Palghar ke paas ek bada road accident saamne aaya, jahan sadak par maujood gehre pothole ki wajah se kai gaadiyon ke tyres achanak burst ho gaye. Iske baad ek ke baad ek vehicles takraate chale gaye aur 15 se zyada gaadiyan chain accident ka shikaar ho gayi.
Prarambhik jaankari ke mutabik, bhaari baarish ke baad highway par bane potholes drivers ko nazar nahi aaye. Ek vehicle ka tyre burst hote hi peeche aa rahi kai gaadiyan control kho baithi aur chain collision ho gaya. Haadse ke baad highway par lamba traffic jam lag gaya aur vehicles ki movement kaafi der tak prabhavit rahi.
Accident ki soochna milte hi police aur highway patrol ki teams turant mauke par pahunchi. Damaged vehicles ko road se hataakar traffic ko normal karne ki koshish ki gayi. Kuch logon ko halki chot aane ki khabar hai, jabki kisi bade jaan-malk ke nuksaan ki pushti ab tak nahi hui hai.
Lagataar monsoon baarish ke chalte highway par potholes aur road safety ko lekar ek baar phir sawaal khade ho gaye hain. Local authorities se road repair aur maintenance ko lekar sakht kadam uthane ki maang tez ho gayi hai.
Prashasan ne motorists se appeal ki hai ki baarish ke dauran highways par speed limit ka paalan karein, safe distance maintain rakhein aur waterlogged ya damaged road stretches par extra saavdhaani bartein.